Likh Rha Hun Naat Sarwar Sabz Gumbad Dekh Kar - Written Islamic Naats

لِکھ رہا ہوں نعتِ سَرور سبز گُنبد دیکھ کر

کیف طاری ہے قلم پر سبز گُنبد دیکھ کر

ہے مُقدّر یَاوَری پر سبز گُنبد دیکھ کر

پھرنہ کیوں جُھومے ثَنا گر سبز گُنبد دیکھ کر

مسجدِنبوی پہ پہنچے مَرحَبا صلِّ عَلٰی

ہوگیا جاری زَباں پر سبز گُنبد دیکھ کر

جُوں ہی میں پہنچا مدینے کی گلی میں بیقرار

آنکھ میری ہوگئی تَر سبز گُنبد دیکھ کر

رُوح کو تسکین جَانِ مُضْطَرِبْ کو چَین ہے

دِل کو بھی رَاحت مُیَسَّر سبز گُنبد دیکھ کر

انکے منگتے، انکے سائل دوجہاں کی نعمتیں

مانگتے ہیں ہاتھ اُٹھا کر سبز گُنبد دیکھ کر

آپ سے بس آپ ہی کو مانگتا ہے یانبی!

آپ کا ادنیٰ گداگر سبز گُنبد دیکھ کر

لندن و پیرس کا عاشق بھی یقینا مَرحَبا!

بول اُٹھے گا روح پَرور سبز گُنبد دیکھ کر

دُھوپ روزانہ مدینہ جھوم کر ہے چُومتی

اور لپٹ جَاتی ہے آکر سبز گُنبد دیکھ کر

چُوم لیتا ہے مدینہ روز آکر آفتاب

پھر لپٹ جَاتا ہے آکر سبز گُنبد دیکھ کر

ٹُوٹ جائے دَم مدینے میں مرا یارب! بقیع

کاش ہوجائے مُیَسَّر سبز گُنبد دیکھ کر

جَب جُدائی کی گھڑی آتی ہے تو کَوہِ اَلَم

ٹوٹ پڑتا ہے دِلوں پر سبز گُنبد دیکھ کر

آپ کی گلیوں کے کُتّے مُجھ سے تو اچھّے رہے

ہے سُکُوں ان کو مُیَسَّرسبز گُنبد دیکھ کر

وقتِ رُخصت خُون اُگلتے تھے مرے قلب و جگر

آنکھ رَو پڑتی تھی اکثر سبز گُنبد دیکھ کر

میرے مُرشِدنے گزارے ہیں مدینے میں برس

اُن کی رحمت سے سَتَتَّر سبز گُنبد دیکھ کر

یارسُول اللہ! مُرشدپر کرم ہوں بے شمار

سَوئے ہیں قدموں میں آکر سبز گُنبد دیکھ کر

آہ! اے عطّارؔ اتنا بھی نہ تُجھ سے ہوسکا!

جَان کر دیتا نچھاوَر سبز گُنبد دیکھ کر